fridrikv.is

Hótel Edda hefur gengið til samstarfs við hjónin Friðrik Val Karlsson og Arnrúnu Magnúsdóttur, sem áður ráku veitingastaðinn Friðrik V á Akureyri. Friðrik og Arnrún munu í sumar vinna náið með Edduhótelunum 13 sem starfrækt eru á landsbyggðinni að frekari þróun veitingastaða hótelanna.



Hjónin Friðrik Valur Karlsson og Arnrún Magnúsdóttir stofnuðu veitingastaðinn Friðrik V árið 2001. Friðrik er útskrifaður frá Hótel- og veitingaskóla Íslands árið 1993. Friðrik sérhæfir sig í að elda úr fersku íslensku hráefni á nútíma, evrópska vísu, og hefur hann getið sér gott orð fyrir "túlkun" sína á íslensku hráefni og matarhefðum.
Eddu hótelin hafa ávalt lagt áherslu á að nýta það hráefni sem finna má úr nágrenni hvers hótels fyrir sig í sinni matargerð, og kynna þannig íslenska ferskvöru og matarhefðir fyrir erlendum gestum hótelanna, við góðan orðstír.
Í samstarfi við þau hjónin munu hótelin nú leggja áherslu á að skerpa enn frekar á sérstöðu hvers og eins hótels, og draga fram helstu eiginleika íslenskrar náttúru og síns nánasta umhverfis í sinni matargerð.
Edduhótelin hafa fyrir löngu unnið sér sess sem hagkvæmur og þægilegur gistimáti á ferðalögum um Ísland. Nú eru starfrækt þrettán Edduhótel vítt og breitt um landið og er sérhvert þeirra í námunda við einhverjar af helstu náttúruperlum landsins.
Eddu hótelin bjóða hjónin Friðrik Val og Arnrúnu innilega velkomin á Edduhótelin í sumar. Starfsmenn hótelanna munu taka vel á móti þeim hjónum, og hlakka til að njóta góðs af fagmennsku þeirra og áralangri reynslu. Við bjóðum jafnframt alla ferðalanga á ferð um Íslands velkomna á veitingastaði Eddu hótelanna í sumar. Það er okkur tilhlökkunarefni að bera með stolti á borð íslenskan mat, framreiddan af fyrsta flokks fagmennsku á alþjóðavísu.

Fylgist með á www.hoteledda.is