Gott er að strjúka grindina með olíu áður en grillið er hitað til að koma í veg fyrir að
hráefnið festist á
grindinni þegar grillað er.
Hitið grillið vel áður en eldamennska hefst, en grillið iðulega á meðalhita, ekki við of mikinn hita þar sem þá er meiri hætta á bruna.
Þegar fiskur er grillaður er gott að pensla hann með olíu eða smjöri góðri stund áður en grillað er. Þegar fiskurinn er settur á grillið er gott að hreyfa hann aðeins í upphafi þannig að hann festist ekki við grindina.
Best er að snúa fiski aðeins einu sinni þegar hann er grillaður til að forðast að hann losni í sundur.
Ég mæli með að kartöflur séu gataðar með gaffli og síðan grillaðar í smástund á neðri grindinni en síðan færðar á efri grindina og hafðar þar á meðan hitt hráefnið er grillað. Gott er að snúa kartöflunum oft. Ég nota aðeins álpappír þegar grilla á kartöflur á kolagrilli og þá læt ég kartöflurnar liggja með kolunum.
Þegar grillpinnar úr tré eru notaðir er gott að láta þá liggja í bleyti í volgu vatni í tvo tíma áður en hráefnið er þrætt upp á þá. Þetta kemur í veg fyrir að pinnarnir brenni.
Þegar grilla á marinerað hráefni eða hráefni í barbecuesósu er gott að fjarlægja sem mest af marineringunni eða sósunni áður en hráefnið er sett á grillið til að varast að sósan leki niður í grillið og valdi bruna. Varist að hafa grillið of heitt þegar svona hráefni er grillað vegna þess hvað það er viðkvæmt fyrir bruna.
